Lüderitz - Ehangano lokukwata eeshi dohake ledina Future Energy lokoWalvis Bay olo hali longele kumwe nehangano loNovanam, ola yandja omaano omatalashe e li 20 koshipangelo shepangelo shaLüderitz mEtitano la dja ko.
Pefimbo ta yandje omaano omatalashe omukalelipo wehangano loFuture Energy Beverly Khi-Khoeb okwa pandula epangelo laNamibia, eshi le va pa oufemba wokukwata eeshi doludi lohake okudja modula 2013.
Khi-Khoeb okwa tumbula kutya, ehangano loFuture Energy, ole litula mo mokuvatela oshiwana shaNamibia pamukalo wokushunifa sha moshiwana kwaasho va likola.
Okwa ti odula 2018, ehangano eli ola li la wapaleka omukunda woshikondo shopaumwene moshipangelo shepangelo shaLüderitz. Odula yoneudo, ova yandja omatalashe okeembete dovanaudu e li 20, a yandjwa komukulunhu woshipangelo Dr Ali Mbuyi.
Khi-Khoeb oo e li odalele yaLüderitz, ashike paife okuli omukalimo koWalvis Bay okwa tumbula kutya modoolopa yaLüderitz omu na eemhumbwe dihapu. Omupedu mayola wodoolopa yaLüderitz Brigitte Fredricks, okwa li e va kufila ko unene tuu keemhumbwe odo da palamena oshihakulilo shaLüderitz poo opo nee pa dja ehangano loFuture Energy la hovela okuyambidia oshihakulilo eshi okuhovela odula ya ya.
Moku tambula ko omatalashe, Dr Mbuyi okwa pandula ehangano loFuture Energy, eshi ta li twikile nokuyambidida oshihakulilo shaLüderitz.
Okwa ti omatalashe oo a yandjwa otaa ka kwafela oshiwana shomoodoolopa shaashi ovakwashiwana ovo tave ke lihanga va nangekwa moshihakulilo omo, otava ka nangala komatalashe oo a yandjwa kehangano loFuture Energy.
Omukulunhu wehangano loNovanam Edwin Kamatoto, oshoyo Omunambelewa weedjo dopanhu nomupopiliko wehangano loNovaNam naLalandi, Marelise Serfontein dja koFuture Energy, naKansela woshikandjo hoololwa sha !Nami#nus Jan Scholtz, navo opo va li peyandjo lomatalashe moshihakulilo shaLüderitz